12.01.2021 ж шамамен кешкі сағат 22.30-да, Бәйдібек ауданы аумағындағы Шымкент-Самара тас жолының 56 шақырымында «Вольво» маркалы ауыр жүк көлігінің жүргізушісі рульді басқара алмай, аударылып кеткен.
Оқиға орнына жеткен Бәйдібек АПБ-нің полицейлері шетелдікке автокөлікті қайта тұрғызуға көмектесіп, оны айыппұл тұрағына жеткізді. Көкөністер тиелген бұл автокөліктің Қырғызстан Республикасынан Ресей Федерациясына қарай бағыт алғаны анықталды. Жол апаты салдарынан қаза болғандар мен зардап шеккендер жоқ. Жүргізушіге тиісті медициналық көмек көрсетілді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Ер адам, яғни Қырғызстан азаматына қатысты полиция қызметкерлері ҚР ӘҚБтК-нің 610-бабы «Көлiк құралдары жүргiзушiлерінiң жол жүрісі қағидаларын адамдардың денсаулығына зиян келтiруге, көлiк құралдарының немесе өзге де мүлiктiң бүлінуіне алып келген бұзушылығы»бойынша әкімшілік хаттама толтырды. Осы жайт бойынша жиналған материалдар тиісті шешім қабылдау үшін сотқа жіберілетін болады.
Қырғызстан Республикасының азаматы полицейлердің көрсеткен көмегіне өз ризашылығын жеткізді: «Түнгі уақытта трассада менің көлігім аударылып кетті. Сол сәтте дер кезінде көмекке келіп, мені құтқарып қалған полицейлерге алғыс айтамын! Мені тамақтандырып, медициналық көмек те көрсетілді. Аударылған көлігімді қайтадан тұрғызып берді. Полицейлерге үлкен рақмет!»
Өз кезегінде, тәртіп сақшылары автокөлік иелеріне әрдайым жолда, әсіресе ауа-райының қолайсыз кезінде және көктайғақта абай болуға шақырады. Сондай-ақ жол қозғалысы ережелері мен қашықтықты сақтауды ескертеді. Жүргізушілер есіңізде болсын: жол қателіктерді кешірмейді!
Түркістан облысы ПД-нің баспасөз қызметі
