Төлеби АПБ-не жергілікті тұрғын арызданады. Әйелдің айтуынша, төркініне қыдырып кетіп, 20 күннен келгенінде үйіндегі 100 000 -нан астам теңге тұратын теледидары жоқ болады. Содан бірден полицейлердің көмегіне жүгінеді. Аталған жайт ҚР ҚК-нің 188-бабы «Ұрлық» бойынша СДТТБТ-ға тіркелді-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Ұрлық қылмысын ашу мақсатында тәжірибелі полиция қызметкерлерінен жедел-тергеу тобы құрылды. Жедел уәкілдер қажетті іс-шаралар кешенін жүргізіп, куәгерлерден сұрастыру жұмыстарын жүргізді. Нәтижесінде Төлеби АПБ-нің қызметкерлері күдікті ретінде Леңгір қаласының тұрғынын құрықтады. Ол арызданушының күйеуінің досы болып шықты.
Тергеу барысында анықталғандай, жәбірленуші үйінде жоқ кезде, күйеуінің досы келеді. Содан екі дос ішімдік ішеді. Таңертең үй иесі жұмысқа кетеді. Ұйқыдан тұрған досы үйде еш жоқтығын пайдаланып, теледидарды жымқырып кетеді. Күдікті досының үйінен ұрлаған теледидарын 20 мың теңгеге сатып жібереді. Полиция қызметкерлері ер адамның бұрын сотты болғанын анықтады. Қазіргі уақытта аталған жайт бойынша сотқа дейінгі тергеу амалдары жүргізілуде. Ер адамның бас шарасы қолхатта.
Өз кезегінде, Түркістан облысының полицейлері азаматтарға қырағы болу және өз үйлерін қараусыз қалдырмауды ескертеді. Пәтер ұрлығы болған жағдайда жедел түрде «102» телефоны бойынша полицияға хабарласу қажет, бұл полиция қызметкерлеріне қылмысты «ізін суытпай» ашуға көмектеседі.
ТО ПД-нің баспасөз қызметі
