Қазығұрт АПБ-не жергілікті тұрғын арызданған. Жәбірленуші азаматшаның айтуынша түнгі сағат 02:00-дер шамасында белгісіз тұлға үйіне ұрлыққа түскен. Түрлі алтын бұйымдарын ұрлап, жалпы құны 450 000 теңге шығын келтірген. Полиция қызметкерлері аталған жайтты ҚР ҚК-нің 188-бабы «Ұрлық» бойынша СДТБТ-ға тіркеді-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Хабар алысымен тәртіп сақшыларынан тәжірибелі қызметкерлер жұмылдырылып, оқиға орнына шықты. Жедел-іздестіру іс-шаралары барысында полицейлер куәгерлерден жауап алды. Нәтижесінде 2 сағат ішінде күдікті ретінде жәбірленуші азаматшаның көршісі ұсталып, полиция бөліміне жеткізілді. Айғақты зат ретінде қолды болған алтын бұйымдар заңды иесіне қайтарылды. Қазіргі таңда тергеу амалдары жалғасуда. Күдікті азаматтың бас шарасы қолхатта.
Полицейлер анықтағандай күдікті үйде адам жоқтығын біліп, терезесін бұзып үй ішіне енген. Барлық бөлмелерде шашып, төсек орындарын қопарып, жатын бөлмедегі сейфтің кілтін тауып алған. Содан соң оны ашып, ішінен алтын бұйымдарды ұрлаған. Алайда күдіктінің арам ойы іске аспай қалды, тәртіп сақшылары ұрланған бұйымдарды сатылмай тұрып, «ізін суытпай » ұстады.
Өз кезегінде полиция қызметкерлері бағалы бұйымдарыңызға сақ болып, үйлеріңізге дабылқаққыш, бейнебақылау орнатуға кеңес береді. Терезелеріңізге темір торлар салып, есіктеріңізді мықты құлыптармен бекітіңіздер деп ескертеді. Сіз ұрлықтың құрбаны немесе куәгері болсаңыз тез арада «102» телефонына хабарласыңыздар.
ТО ПД-нің баспасөз қызметі
