Ордабасы АПБ-нің кезекші бөліміне жергілікті тұрғын арызданған. Онда түскі уақытта жайлымда жүрген екі бас жылқысының жоғалып кеткенін көреді. Содан соң арызданушы бірден полиция қызметкерлерінен көмек сұраған. Аталған жайтты полиция қызметкерлері СДТБТ-ға 188-1-бабы «Мал ұрлығы» бойынша тіркеп, күдіктілерді іздестіруге кірісті-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Тәртіп сақшылары тұрғынның төрт- түлігін қолды етіп жүрген ұрыларды ұстау мақсатында қажетті деп танылған іс-шараларды жүзеге асырды. Көрген-білгендерден жауап алып, жақын аймақтарды түгел қарап шықты. Мал базарлары мен көліктер мұқият тексерілді. Осындай жан-жақты жұмыстардың нәтижесінде жинақталған ақпарат көздері арқылы полиция қызметкерлері күдікті ер азаматты тұрғылықты мекен-жайынан тәулік ішінде Ордабасы ауданына қарасты ауылдан ұстады.
Тергеу амалдары барсында күдікті жәбірленушінің танысы болып шықты. Сондай-ақ күдікті азамат малды ұрлауды алдын ала жоспарлап жүрген. Жылқыларды ауылдан 4 шақырым жердегі тоғай ішінде қараусыз жайылып жүргенін көріп жымқырып кеткен. Жәбірленушіге келтірілген шығынның жалпы көлемі 800 мың теңге.
Қазіргі уақытта аталған жайттар бойынша сотқа дейінгі тергеу амалдары жүргізілуде. Күдікті қамауға алынды.
Өз кезегінде, тәртіп сақшылары облыс тұрғындарына қырағы болуға және өз мүлкін сақтау үшін қажетті шаралар қабылдауға кеңес береді. Мүмкіндігінше аулалар мен қора-жайларын сенімді құлыптармен және қоршаулармен нығайтқаны жөн. Малды таңбалап, ен салдыру керек. Сондай-ақ бақташы жалдау қажет. Егер сіз мал ұрлығының болмаса басқа біреудің мүлкін ұрлаудың құрбаны немесе куәгері болсаңыз, тез арада полицияға 102 нөміріне хабарласыңыз.
ТО ПД-нің баспасөз қызметі
