Түркістан облысы аумағында республикалық «Қауіпсіз жол» жедел-профилактикалық іс-шарасы 18-қазаннан бастап бастау алды. Үш күнге созылатын іс-шараның негізгі мақсаты — жол-көлік оқиғаларының алдын алу және жүргізушілер арасында көлік тәртібін арттыру, жол-көлік оқиғаларын және апаттарды азайтуға бағытталған рейдтер ұйымдастыру. Осыған орай аудан, қалалық полиция бөлімдері қарқынды қызмет атқаруда. Полицейлер күні-түні жол қозғалысына қатысты құқық бұзушылықтарды анықтап, алдын алуға барын салып еңбек етуде-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Мысалы, Отырар АПБ-нің полицейлері «Қауіпсіз жол» іс-шарасының бірінші күнінде 50 әкімшілік хаттама толтырды. Оның ішінде мас халде көлік басқару бойынша 1 азаматқа хаттама толтырылып, автокөлігі айыптұрағына қойылды. Қауіпсіздік белдігін тақпаған 21 азамат, жаяу жүргіншіге жол бермеген 3 азамат, көлікте ұялы телефон пайдаланған 2 азамат, көлігін техбайқаудан өткізбеген 7 азамат, белгіленбеген жерден жолды кесіп өткен 7 азаматқа хаттамалар толтырылып, айыппұлдар салынған. Оған қоса, РФ-ның «ВАЗ-21065» маркалы автокөлігіне жалған мемлекеттік нөмір тағып жүрген жергілікті тұрғын анықталды. Қазіргі таңда бұл іс ҚР ӘҚБтК-нің 590-бабы бойынша тіркеліп, құжаттар жинақталып, сотқа жолдануда. Сонымен қатар, Отырарлық тәртіп сақшылары «Лада» маркалы көлікті тексеру барысында заңсыз қару тасымалдауды анықтады. Яғни, көліктен тіркелмеген «ИЖ» маркалы 12 калибрлі 1 ұңғылы қару табылды. Аталған жайт ҚР ӘҚБтК-нің 482-бабымен тіркелді
Жалпы, Түркістан облысы ПД жергілікті полиция қызметі полицейлері «Қауіпсіз жол» жедел-профилактикалық іс-шарасы барысында жол-көлік оқиғаларының алдын алу және қатысушылар арасында жолда жүру қауіпсіздігі бойынша сауаттылығын арттыру бойынша түсіндірме әңгіме жүргізіп, ЖҚЕ жазылған ескертпе қағаздарын да таратуда. Сондықтан, жолда абай болыңыз, жүргізуші! Өзіңіздің, отбасыңыздың амандығы үшін жол қозғалысы ережелерін сақтай отырып, көлік тізгіндеңіз! Өмір – баршамыз үшін қымбат екенін естен шығармағайсыз!
Түркістан облысы полицейлері жүргізушілерге ескертеді: ауа-райының салқындауына байланысты, жолда абай болыңыздар!
ТО ПД-нің баспасөз қызметі
