Шардара аудандық полиция бөліміне алаяқтың құрбаны болған жергілікті тұрғын арызданды. Жәбірленушінің айтуынша, бейтаныс әйел оған мемлекеттен қайтарымсыз субсидия алуға көмектесуге уәде берген. Алаяққа сенген ауыл тұрғыны оған 300 000 теңге берген. Алайда арадан біршама уақыт өтсе де, уәде орындалмайды. Бұл жайтты полицейлер ҚР ҚК-нің 190-бабы «Алаяқтық» бойынша тіркеді.
Жедел-іздестіру іс-шараларының нәтижесінде Шардара ауданының полицейлері күдікті ретінде бұрын алаяқтық жасағаны үшін сотталған анықтады. Полицияға жеткізілген сезікті Шардара қаласының тұрғыны болып шықты.
Тәртіп сақшыларының тындырымды жұмысының нәтижесінде күдіктінің қайтарымсыз субсидия алуға көмек беремін деген сылтауымен тағы бірнеше әйелдерді алдағаны белгілі болды. Жалпы жас қыз жәбірленушілерге миллион теңгеден астам шығын келтіріп, алаяқтықтың 3 дерегіне қатысы бар болып шықты.
Қазіргі уақытта осы жайттар бойынша сотқа дейінгі тергеу амалдары жүргізілуде. Тергеу күдіктінің осыған ұқсас басқа да қылмыстарға қатысы бар-жоғын анықтайды.
Түркістан облысының полицейлері азаматтарға қырағы болуға және бейтаныс адамдарға сенгіштік танытпауға кеңес береді. Сондай-ақ күмәнді қызметтерді ұсынатын бейтаныс адамдарға ақшаңызбен жеке деректеріңізді бермеңіз деп ескертеді.
