ҚР Ішкі істер министрлігі «Полицияның 30 жылдығы» мерекесі мен «Балалар жылына» орай, «Погонды журналист», «Менің полициям/My police» имидждік-ақпараттық жобасын ұйымдастырды. Бұл бойынша Түркістан облысының полицейлерінің қатысуымен қажетті бейнежазбалар түсіріліп, ролик дайындалып, байқауға ұсынылды.
Нәтижесінде Түркістан облысы үздіктер қатарынан табылып, Астанадан ҚР ІІМ Марат Ахметжановтың арнайы «Дипломы» мен «Алғыс хаты» жетті. Марапаттарды табыстау үшін Полиция департаментінің мәжіліс залында іс-шара өткізілді. Онда Түркістан облысы ПД-нің бірінші орынбасары Б.Айтпаев құттықтау сөзін арнап, министрліктің «Үздік бейне материал» дипломын Жандос Жұмабекке, Ал ІІМ ұйымдастырған «Менің полициям» жобасының қорытындысымен Алпамыс Азаматұлына «Алғыс хат» табыстады. Өз кезегінде Түркістан облысының атынан «Погонды журналист» жобасына сюжет дайындаған, еліміздегі маңдайалды «Хабар 24» телеарнасының тілшісі, майталман маман Жандос Жұмабек: «Мен осы жоба арқылы полицейлердің жұмысы өте ауыр, қиын әрі қауіпті екенін білдім, көзбен көрдім. Яғни патрульдік полиция батальонының қызметімен таныстым. Таңертеңгісін басшылықтан тапсырма алып, бір күндік әріптесім полиция аға лейтенанты Нұрқанат Өтешовпен үлкен трасса бойына жол тарттық. Жол қауіпсіздігін қамтамасыз етуде таң атқаннан, қас қарайғанша қызметте жүрдік»-деп атап өтті. Ал «Менің полициям» имидждік-ақпараттық жобасына Түркістан облысы Жетісай ауданының Салтөреевтер отбасы қатысты. Бейнероликте Азамат пен Динаның үлкен ұлы Алпамыс, полиция қызметімен арнайы танысты. Мұнда Алпамыс ата-анасының рұқсатымен олардың жұмыс орындарына барып, полицияның қиын да қауіпті жұмысын көріп, сюжет дайындады. Тіпті ата-анасының Жетісай қаласындағы өртке оранған базарда қоғамдық қауіпсіздікті сақтау мен қылмыстардың алдын алу бағытында қызмет еткенінің куәгері болды. Тұрғындардың ата-анасына алғыс айтқанын көріп, қуанды. Елдің қорғаны боламын деген бала арманына қанат бітті.
«Менің полициям – әкем мен анам! Мен болашақта полицей болғым келеді. «Алғыс хат» жібергені үшін министр мырзаға рақметімді айтамын!»-деп шынайы қуанышын жеткізді. Іс-шара соңында үздіктер естелікке суретке түсті.
