Елу алты жастағы аға буын Абдикаимов Әуездің туылғаннан бері төл құжаты болмаған. Жалғыз басты әке 5 баласын асырау мақсатында ауылдан ауылға әркімнің жалдамалы мал бақташысы болып жұмыс жасап жүре берген. Осы оқиғаға байланысты Сарыағаш аудандық полиция бөлімі Көші-қон қызметі бөлімшесінің аға инспекторы полиция майоры Абдуманапов Димаш және осы бөлімнің бас маманы Омарова Маржан аудан орталығынан 100 шақырым шетте тұратын азаматқа төл құжатын рәсімдеп берді-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Тәртіп сақшыларының атқарған қызметтеріне көңілі толған Әуәз ағамыз:«Мен, Абдикаймов Әуез, жұбайым қайтыс болып кеткен. Бес баланың әкесімін. Бала-шағама азда болса жәрдем болсын деп, көмектесу мақсатында мал бағып жүрмін. Аудан орталығына баруға жағдайым болмады. Өзімде төл құжат алуды ойлап жүрген едім. Зейнетке шығар уақытымда жақындап қалды. Осы орайда көмек берген полиция қызметкерлеріне алғысым шексіз. Елеп-ескеріп, өздері келіп құжаттарымды рәсімдеп берді.Алғысым шексіз» — деп жылы лебізін білдірді.
Осы орайда айта кететін жайт, Сарыағаш ауданының полиция қызметкерлері карантин режиміне қарамастан құжаттанбаған тұрғындарға көмек беруге дайын. Бұл бағыттағы жұмыстар алдағы уақытта да жалғасатын болады.
ТО ПД-нің баспасөз қызметі
