Төлеби АПБ-ның қызметкерлері «Абайлаңыз, балалар!» жедел-профилактикалық іс шарасын ұйымдастырды. Шараға №8 көпсалалы техникалық колледждің 1-4 курс студенттері, ұстаздар, сонымен қоса ата-аналар да қатысты. Шараның мақсаты — балалардың қатысуымен болатын жол қозғалысы оқиғаларының себептері мен мән-жайларын зерттеу, мектепке баратын, мектептен қайтатын, балалар жиі баратын орындарда қауіпсіз қозғалыс бағыттарын әзірлей отырып, балалардың жолдағы қауіпсіздігін қамтамасыз ету.
Кездесу барысында студенттерге жол қауіпсіздігін үнемі сақтау мәселесі бойынша түсіндірме жұмыстары жүргізіліп, жолда жүру ережелері таныстырылды. Полицейлер келгендерге қоғамдық орындар мен адам көп шоғырланатын аумақтарда ережелерді сақтап жүру керектігін түсіндіре кетті.
Жиын соңында ата-аналарға жол қауіпсіздігін сақтауға арналған 60 шақты жадынамалар таратылды. Тәртіп сақшылары ата-аналарға бірлесіп, жұдырықтай жұмылып әрекет етуге, балаларға күнделікті жолда жүру ережелерін ескертіп отыруға кеңес берді.
