Қазығұрт аудандық полиция бөліміне жергілікті тұрғын арызданды. Ер адам өз арызында, тұрғын үйінің қақпасы алдында көше бойында тұрған «Лада-21214» маркалы көлігін белгісіз біреу рұқсатсыз айдап кеткені бойынша шағымданды. Аталған жайтты полицейлер ҚР ҚК-нің 200-бабы «Автомобильді немесе өзге де көлік құралын жымқыру мақсатынсыз құқыққа сыйымсыз иеленіп алу» бойынша тіркеуге алып, бірден іске кірісіп кетті.
Қылмысты ашу мақсатында тәртіп сақшылары оқиға орнына шығып, жедел-тергеу амалдарын бастады. Полицейлер тарапынан көлік ұрлаған күдіктіні құрықтау мен түр-тұлғасын анықтау үшін, қажетті барлық шаралар атқарылды. Соның нәтижесінде тәртіп сақшылары, тәулік ішінде жәбірленушінің көлігінің тұрған жерін және күдіктінің жеке-басын анықтады. Яғни жүйелі атқарылған жұмыс арқасында көлікті мас халде заңсыз айдап, ер адам ұсталды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Анықталғандай күдікті түнгі уақытта көшеде, кілттенбеген көлікті байқап, арам ойын іске асырып, айдап кеткен. Сонымен қатар күдікті ер адам жүргізуші куәлігі жоқ бола тұра автокөлікті мас халде басқарған.
Полиция қызметкерлері аталған жайтты ҚР ӘҚБтК-нің 608-бабы «Жүргізушінің көлік құралын алкогольдік, есірткілік және (немесе) уытқұмарлық масаң күйде басқаруы, сол сияқты көлік құралын алкогольдік, есірткілік және (немесе) уытқұмарлық масаң күйдегі адамның басқаруына беру» бойынша тіркеді. Жинақталған іс құжаттар сотқа жолданып, соттың шешімімен 20 тәулікке қамауға алынды. Ал өзгенің көлігін заңсыз айдап кеткені бойынша ҚР ҚК-нің 200-бабымен тергеу амалдары жүргізілуде.
