Сарыағаш АПБ-ның қызметкерлері кәсіпкерлік палатасынан қайтарымсыз қаржыны шығарып беремін деп жергілікті тұрғынды сан соқтырған күдікті әйелді ұстады.
Яғни Сарыағаш аудандық полиция бөліміне жәбірленуші әйел арызданып келген. Оның айтуы бойынша, сырттай танысы қайтарымсыз ақша алып беремін деп, бірінен 300 000 теңге ақша алған. Осылайша оны 4 ай бойы алдап, қайтарымсыз ақшаны алып бермей, не ақшасын қайтармай жүрген. Тәртіп сақшылары аталған жайтты ҚК 190-бабы «Алаяқтық» қылмыстық құқық бұзушылығы бойынша СДТБТ-ға тіркеді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Хабар алысымен полиция қызметкерлері алаяқтық қылмысын ашу мақсатында оқиға орнына жетті. Полицейлердің жан-жақты жүргізген жедел-іздестіру іс-шараларының нәтижесінде, күдікті әйел Сарыағаш қаласынан ұсталды. Оны бірден ПБ-ға жеткізді. Қазіргі уақытта аталған жайт бойынша сотқа дейінгі тергеу амалдары жүргізілуде. Белгілі болғандай, күдікті жәбірленушілерден алған ақшаны өз қажеттілігіне жаратып жіберген.
Өз кезегінде, Түркістан облысының полицейлері азаматтарға қаржы мәселелерін шешуге күмәнді көмек ұсынатын бейтаныс адамдарға мұқият болу және артық сенімсіздік көрсетпеу қажеттігін ескертеді. Егер осындай қылмыстардың құрбаны немесе куәгері болсаңыз, онда «102» телефоны бойынша полицияға тез арада хабарласыңыз.
