Сарыағаш АПБ-ға ұрлықтың құрбаны болған жергілікті тұрғын арызданды. Жәбірленуші ер адамның айтуынша, оның сауда орталықтардың бірінде орналасқан ұялы телефон сататын дүкенінен белгісіз біреу сөресінде тұрған «Spark 6» маркалы ұялы телефонын ұрлап кеткен. Келтірілген шығын көлемі 100 000 теңгені құрады. Полиция қызметкерлері аталған жайтты ҚР ҚК-нің 188-бабы «Ұрлық» бойынша СДТТБТ-ға тіркеді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Тәртіп сақшылары хабар алысымен оқиға орнына жедел жетті. Ұрлық жайты орын алған аумақтың барлығын жіті тексеріп, куәларден жауап алды. Дүкен ішіндегі бейнебақылау камераларын тексерген сәтте, ұялы телефонды жымқырған күдіктіні байқады. Полицейлер осы бағыттағы жұмысты одан әрі жүргізіп, күдікті әйелдің жеке басын анықтады. Ол бұрын қалта ұрлығын жасап, сотты болған Шымкент қаласының тұрғыны болып шықты. Полиция қызметкерлерінің атқарған тыңғылықты жұмыстарының нәтижесінде күдікті әйел тәулік ішінде тұрғылықты мекенжайынан ұсталды. Айғақты зат ретінде ұялы телефон тәркіленіп алынып, заңды иесіне қайтарылды. Қазіргі таңда аталған жайтқа байланысты тергеу амалдары жүргізілуде.
Белгілі болғандай, күдікті айналасында адамдардың жоқтығын пайдаланып, сөреде тұрған ұялы телефонды білдіртпей алып кеткен. Осылайша қолды еткен затын үйіне алып барып, өзі пайдалану мақсатында жасырған.
Түркістан облысы полицейлері азаматтарға бағалы заттарыңыз бен ұялы телефондарыңызға, әмияндарыңызға сақ болыңыздар деп ескертеді. Қалта ұрыларының көзі түспес үшін бағалы заттарыңызға қатысты барлық қауіпсіздік шараларын ұйымдастырып, бейнебақылау, дабылқаққыш орнатуға кеңес береді. Мүліктің кез-келген түріне қырағылықпен және жауапкершілікпен қарағанда ғана мұндай жағдайларды азайтуға болады.
