Түркістан облысы Полиция департаменті Жергілікті полиция қызметі Ювеналды полиция бөлімінің қызметкерлері ағымдағы жылдың қыркүйек айынан бастап «Ел ертеңі-жас ұрпақ» әлеуметтік жобасын өткізуде. Аталмыш жобаның негізгі мақсаты — балалардың тұрмыс жағдайында зорлық-зомбылыққа ұшырауының алдын алуға, балалар мен жасөспірімдер арасында заң бұзушылықтарды азайтуға, Әлеуметтік-психологиялық жағдайы төмен отбасыларына ерікті қолдау шараларын өткізуге бағытталған. Аталған жоба шеңберінде «Береке» қоғамдық бірлестігімен «Түркістан облысы ата-аналар қауымдастығы» қоғамдық бірлестігі және «Отбасы академиясы» Түркістан ҚПБ ғимаратында басқарманың аймақтық учаскелік полиция инспекторлары мен кәмелетке толмағандардың ісі жөніндегі полиция инспекторларына арналған семинар-тренинг өткізілді — деп хабарлайды 102info.kz ақпарат агенттігі. Онда балаларды тәрбиелеудегі ата-ананың жауапкершілігін арттыру, балаларға қатысты зорлық-зомбылық пен қатыгез қарым-қатынастың, кәмелетке толмағандар арасындағы құқық бұзушылықтың, өзіне-өзі қол салудың алдын алу, білім беру ұйымдарының психологиялық қызметтерінің жұмысын жетілдіру, зорлық-зомбылық, суицид құрбандары болған балаларға медициналық-психологиялық, құқықтық көмек көрсетуді ұйымдастыру, балалардың құқықтарын қорғау мәселелері жөніндегі қызметті үйлестіру туралы сөз етілді.
