Түркістан облысында «Зорлық-зомбылыққа жол жоқ!» тақырыбында семинар өткізілді

Отбасында орын алатын тұрмыстық зорлық-зомбылықтың алдын алу мақсатында, Түркістан облысы Полиция департаментінің Әйелдерді зорлық-зомбылықтан қорғау тобының қызметкерлері тұрақты түрде профилактикалық іс-шаралар ұйымдастырып келеді. Мәселен, Жетісай АПБ ЖПҚ ӘЗЗҚТ аға инспекторы Жанна Шалбекова, аудандағы қыз-келіншектердің жай-күйін саралай отырып, оларды қандай да бір қысым көрсетілуден қорғау үшін білім беру орталықтарында маңызы зор іс-шара жасады. Оған медицина және жоғары білікті психолог мамандарын шақырып, қыздар арасында орын алатын зорлық-зомбылық бойынша семинар-сабақтар өткізді— деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Аталған іс-шарада бүгінгі таңда көптеп орын алып жатқан ерте жүктілік жайттары мен отбасындағы әлімжеттік қылмыстарының алдын алуға бағытталған сұхбаттар өрбіді. Өзгенің қателігінен сабақ алу мақсатында, оқушылар, ұстаздар мен жиналысқа шақырылған аналарға тұрмыстық зорлық-зомбылыққа қатысты тіркелген жайттар, әйелдердің қорғау нұсқамасына алынуы сынды деректер айтылып, түсіндірме жұмыстары жүргізілді. Сондай-ақ сабақ барысында кәмелет жасына толмаған қыздар тарапынан мамандарға түрлі сұрақтар қойылып, нақты жауаптар берілді. Ең бастысы — әрбір адамды қорғайтын заң барын ұмытпау қажет, егер де кездейсоқ келеңсіз жағдайларға тап болсаңыз, бірден тиісті мекемелерге арыздану керектігі айтылды.