Мерейлі «майорлар» отбасы

Жетісайлық Салтөреевтер отбасын көпшілік форма киіп, шен таққан мерейлі «майорлар» отбасы деп біледі. Аудандық полиция бөлімінде учаскелік полиция инспекторы қызметін атқаратын Азамат қалтқысыз қызметімен әрдайым халықтың алғысын алуда. Ал, жұбайы Дина Ювеналдық полиция тобының абыройлы қызметкері.
Қос жұптың отау құрғандарына биыл 10 жылға жуық уақыт болған. «Біз қызмет бабында жүріп таныстық. Табыстық. Отау құрып, отбасылы болдық. Бүгінде екі перзент сүйіп отырмыз – дейді отағасы.
Полиция майоры Азамат Салтөреев Жетісай ауданының тумасы. 2011 жылы Семей заң колледжін бітіріп келген соң қызметін Мақтаарал ауданында учаскелік полиция инспекторы болып бастаған. Бір жылдан соң Жетісай ауданындағы полиция бөлімі Жергілікті полиция қызметі Ювеналдық полиция тобына ауысқан. Ал, биылдан бастап учаскелік полиция инспекторы қызметіне тағайындалды.
— Аумағымда 2500-ге жуық халық бар. Мектеп, колледж, тойхана, дүкен секілді өзге де коммерциялық нысандар орналасқан. Таңертең жиналыстан шыққан соң, көшені аралап халықтың жағдайымен танысамыз. Профилактикалық жұмыстарды атқарамыз. Қазіргі кезде «Учаске» жедел профилактикалық іс-шарасын өткізудеміз. Әрбір үйді аралап, мәліметтерді электронддық базаға ендіріп жатырмыз. Халықта жақсы таниды. Суреттеріміз халық көп жүретін қоғамдық орындарда ілулі тұр – дейді ол.
Ал, жұбайы ювеналдық полиция тобының инспекторы, полиция майоры Дина Әубәкірова да Жетісай ауданының тұрғыны. Тіпті жолдасымен бір мектепте оқығанмен, бұрын бір-бірін мүлдем кезіктірмепті.
— Біз полиция бөлімінде тәжірибеде жүрген кезде таныстық. Қазір үлгілі отбасының бірі болып отырмыз. Аллаға шүкіршілік айтамын. Әрі, жағдайымды түсініп, өзімнің таңдаған саламда қызмет етуге мүмкіндік беріп отырған отбасыма алғысымды білдіремін – дейді ол.
Қос майор қызметке бірге барады. Бірге түстеніп, кешкісін де қызметтен бірге қайтады. Рейдтерге де бірге шығып, қоғамдық тыныштықты күзетуде де қалтқысыз еңбегімен көрініп келеді.
Жалпы Азамат Салтөреевтің полиция мамандығын таңдауға әкесі Сағадат себепкер болыпты. Капитан шенінде зейнетке шыққан әкесі әрдайым ұлына кеңес беріп, қолдап отырған. Тәулік талғамай халыққа қызмет еткенін өзіне үлгі тұтқан ұлыда «Өскенде әкем секілді полиция боламын» деп алдына мақсат қояды.
— Әке жолын жалғап, абыройлы қызмет ету мен үшін үлкен абырой. Қазір екінші ұлым Шахадат та ата-анам сияқты полиция қызметкері боламын деп айтып жүр. Әрине, тәртіп сақшысы болу оңай емес. Уақытпен санаспай жұмыс істеуіңе тура келеді. Бірақ адам өзі мамандығын жүрек қалауымен таңдаса, кез-келген қиындықты жеңе біледі әрі жетістікке де жетеді деп айта алар едім. Сондықтан ұлымның таңдауына менде қолдау білдіремін,- дейді Азамат Салтөреев.