Сарыағаш ауданының сақшылары «Жібек жолы» кеден бекеті арқылы есірткіні заңсыз алып өтпекші болған Өзбекстан елінің азаматын құрықтады. Нақтырақ айтсақ, бақылау бекетінің қызметкерлері ҚР-нан Өзбекстан Республикасының аумағына өтпекші болған ер азаматтың билетін тексеріп жатқан кезде, «Белка» атты қызметтік ит бірнеше метрден жүгіріп барып, ер азаматтың жанына жақындап үріп, белгі бере бастайды.
Осыдан соң бекеттегілер бірден Сарыағаш АПБ-нің сақшыларына хабарласып, болған жайтты түсіндірді. Тәртіп сақшылары оқиға орнына келіп, бірқатар тексеру жұмыстарын жүргізді. Тиянақты жүргізілген тексеру жұмыстарының нәтижесінде ер азаматтың шалбарының қалтасынан қағаз орамаға оралған есірткі затына ұқсас зат табылды. Полиция қызметкерлері айғақты затты сараптамаға жолдап, оның қорытындысы бойынша жалпы салмағы 2 грамм кептірілген марихуана екенін анықтады.
Аталмыш жайт Сарыағаш АПБ-да ҚК-нің 286-бабы «Айналыстан алып қойылған заттардың немесе айналысы шектелген заттардың контрабандасы» бойынша тіркелді. Қазіргі таңда күдікті ер азаматқа қатысты тергеу амалдары жалғасуда — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Осы тұста Түркістан облысының полицейлері әрбір азаматқа әрдайым салауатты өмір салтын ұстанып, спортпен шынығуға кеңес береді.
ТО ПД баспасөз қызметі
