Түркістан ҚПБ-ға жергілікті тұрғын арызданды. Жәбірленушінің айтуынша, ескі танысы 2019 жылдың шілде айында «Таныстарым бар, 10 соттық жер алып, заңдастырып беремін» деп әбден сендіріп, алаяқтық жолмен 200 000 теңгесін жымқырғанын хабарлады. Алайда арадан 1 жылдан астам уақыт өтсе де не жерін ала алмаған, не ақшасын қайтармаған. Аталған жайтты полиция қызметкерлері АПБ-ға ҚР ҚК-нің 190-бабы «Алаяқтық» бойынша тіркеді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Қалалық тәжірибелі полицейлерден құрылған жедел-тергеу тобы жергілікті тұрғынды арбауына түсірген алаяқты ұстауға қажетті шараларды жасады. Куәлардан жауап алу барысында, жинақталған ақпарат көздері арқылы күдіктінің жеке-басы анықталып, ол полиция басқармасына жеткізілді. Ұсталған ер адам жергілікті тұрғын болып шықты. Сондай-ақ түркістандық полицейлер алаяқтық жолмен алынған ақшаны өз қажеттілігіне жаратып жібергенін анықтады. Қазіргі таңда күдіктіге қатысты сотқа дейінгі тергеу амалдары жүргізілуде.
Түркістан облысы полицейлері азаматтарға алаяқтардан барынша сақ болуды ескертеді. Кез келген ұсынысты қабыл алмай, толық тексеріп алыңыз деп кеңес береді. Кезексіз, уақытынан бұрын мәселемді шешемін деп ақша беріп, алаяққа алданып қалмаңыз. Егер де, сіз, осыған ұқсас қылмыстың куәсі немесе құрбаны болсаңыз, уақыт оздырмай бірден полицейлерге «102» телефоны арқылы хабар беріңіз.
ТО ПД-ның баспасөз қызметі
