Арыс АПБ-нің кезекші бөліміне Көксарай су қоймасы қорығынан екі азаматтың заңсыз балық аулап жатқан жерінен ұсталғаны жөнінде хабарлама келіп түсті. Тексеру барысында, Арыс және Ордабасы ауданының тұрғындары өздерінің «Ауди 100» маркалы көліктерімен келіп, заңсыз балық аулағандары белгілі болды. Көлікті қарау барысында ішінен айғақты зат ретінде 350 келіге жуық түрлі балық, 2 дана қайық, әрқайсысы 100 метрден болатын 4 дана қытай торы табылып, тәркіленіп алынды.
Заңсыз балық аулаған жас жігіттер,істің барлық мән-жайын анықтау үшін аудандық полиция бөліміне жеткізілді. Қазіргі уақытта аталған жайт ҚР ҚК-нің 335-бабы 3-бөлігі 4-тармағы «Балық ресурстарын, басқа да су жануарларын немесе өсімдіктерді заңсыз аулау» бойынша тіркеліп, сотқа дейінгі тергеу амалдары жүргізілуде. Бүгінгі таңда 2 күдікті азаматтың бас шарасы «қолхатта». Ал көлік айыптұраққа қойылды. Балықтар болса, Шардарадағы балық фирмасына өткізілді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде, Түркістан облысының полицейлері азаматтарға заңсыз балық ауламауға, сондай-ақ кез келген Қызыл кітапқа енгізілген жануарлар мен өсімдіктерді жоймауға кеңес береді. Сонымен қатар азаматтарды табиғатты қорғау заңнамасын сақтауға, табиғатты аялауға және браконьерлік пен табиғи ресурстарды заңсыз өндіру үшін әкімшілік және қылмыстық жауапкершілікке тартылатынын есте сақтауға шақырады.
ТО ПД-нің баспасөз қызметі
