Түркістан облысы полицейлері тәртіп сақшыларына қарсылық көрсеткен ағайындыларды ұстады

Қазығұрт АПБ-не жергілікті тұрғыннан көше бойында белгісіз тұлғалар ұялы телефонын тартып алғаны жөнінде хабарлама келіп түседі. Арызданушы жас жігіттің айтуынша жол бойында өзіне таныс емес тұрғындармен сөзге келіспей қалып, дау туындаған. Содан күдіктінің бірі жәбірленушіге бір-екі соққы бергенін, сол жерде қалтасынан ұялы телефоны түсіп қалғанын хабарлаған. Осыдан соң телефонын қайтарып ала алмаған жәбірленуші полициядан көмек сұрауға мәжбүр болған. Аталған жайтты полицейлер ҚР ҚК-нің 293-бабы «Бұзақылық» бойынша тіркеді, деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Оқиға орнына жедел жеткен учаскелік полиция инспекторлары полиция капитаны Медет Тұрсынбек, полиция лейтенанты Бекен Әлібек, полиция лейтенанты Әділет Көшер мән-жайды анықтамауға кіріседі. Жәбірленушінің жауап алып, күдіктілердің жеке-басын анықтап, мекен-жайы арқылы табады. Бұзақылық жасағандар ағайындылар болып шықты. Алайда күдіктілер полицейлерге қарсы түрлі балағат сөздерді айтады. Тәртіп сақшылары сабырға келуін сұрағанымен, құқық бұзушылар заңды талаптарға бағынбай, өздерінің дөрекі мінезін көрсетуін жалғастыра береді. Тіпті учаскелік полиция қызметкерінің біріне өз лауазымдық міндетін атқаруына байланысты өміріне немесе денсаулығына қауіпті емес күш қолданып, ұрып-соғады.
Осылайша сақшылар ағасы мен інісіне ҚР ҚК-нің 380-бабы «Билік өкіліне қатысты күш қолдану» және 378-бабы «Билік өкілін қорлау» бойынша тіркеді. Күдіктілердің екеуі де қамауға алынып, бүгінде соттың қаулысымен кепілмен босатылған. Қазіргі таңда тергеу амалдары жүргізілуде.
Түркістан облысы полицейлері өз кезегінде азаматтарға қоғамдық орында тәртіпті бұзбауға кеңес береді. Мас күйде жүріп, тұрғындардың мазасын алмау керектігін ескертеді. Сонымен қатар, өз қызметтік міндетін атқаруға келген билік өкілдеріне күш қолданудың соңы қылмыстық жауапкершілікке апаратынын ескертеді. Сондықтан қарсылық көрсетіп, құқық бұзушылық жасағанша, өз қауіпсіздігіңізді ескеріп, заң талаптарына бағынғандарыңыз жөн.
Егерде сіз осындай оқиғалардың құрбаны немесе куәгері болсаңыз полицейлерге хабар беріңіз!