Бүгінгі таңда облысымызда қылмыстың көп таралып жаткан түрі есірткімен өсіру болып табылады. Осы қылмыстарға қарсы Түркістан полицейлері жоғары деңгейде жұмыс атқаруда.
Атап айтсақ Түркістан облысы ПД Есірткі қылмысына қарсы іс-қимыл басқармасына Сарыағаш ауданындағы тұрғынның бірі есірткі затына ұқсас өсімдіктерді баптап өсіріп жатқандығы туралы хабарлама түседі. Ақпарат алысымен Сарыағаш аудандық полиция бөлімінің қызметкерлері тез арада іздестіру жұмыстарын жүргізді. Аталған жайтты СДТБТ-ға ҚР ҚК-нің 300-бабы «Құрамында есiрткi заттар бар, өсiруге тыйым салынған өсiмдiктердi заңсыз егіп-өсіру» бойынша тіркеп, сотқа дейінгі тергеп-тексерудің бірыңғай тізіліміне енгізді.
Сарыағаштық тәртіп сақшылары заңмен тыйым салынған өсімдікті егумен айналысатын тұрғынды анықтауға бірден кірісті. Жан-жақты жүргізілген жедел-шаралардың нәтижесінде ақпарат көздері табылып, күдікті тұрғынның жеке-басы мен мекенжайы анықталды. Ол жергілікті тұрғын болып шықты — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Күдікті ер адамның өзінің үйінің бақшасына есірткі еккені анықталды. Бақшадан 3 түп есірткі өсімдігі тәркіленіп алынды. Өз кезегінде тұрғын, аталған есірткіге ұқсас өсімдікті егіп-өсіргенін толығымен мойындады. Сондай-ақ айғақты зат ретінде алынған өсімдіктерге сот-сараптамалық зерттеу тағайындалды. Сараптама нәтижесімен алынған түптер 25 грамм болатын «сора» есірткі заты болып шықты. Қазіргі таңда сотқа дейінгі тергеу амалдары жүргізілуде, күдіктінің бас шарасы «қолхатта».
Өз кезегінде Түркістан облысының полицейлері заңсыз, құрамында есірткі заты бар өсімдіктерді еккені үшін қылмыстық жауапкершілік қарастырылғанын ескертеді. Оған қоса тәртіп сақшылары есірткінің қоғам дерті екендігін ұмытпай, оны өсіріп, қолданып, тасымалдағандармен күресуді күшейтуде. Сондықтан Сіз, есірткі бойынша қандай да бір ақпараттарды білсеңіз бірден полицияның «102» нөміріне хабарласыңыз. Бұл өз кезегінде есірткіге байланысты қылмыстардың азаюы мен жолын кесуге септігін тигізеді.
ТО ПД-ның баспасөз қызметі
