Жолда қалған жолаушы патрульдік полицейлердің тарапына алғыс айтып, түсірген бейнежазбасын жариялады

Әлеуметтік желі қолданушысы киелі облыстың полицейлерін сыртынан түсіріп алған бейнежазбасын жариялап, Түркістан облысы Полиция департаментінің парақшасы арқылы арнайы алғыс айтты.
Жүргізуші бейнежазбасында: Түркістан облысы «гаи» патрульдеріне көп рақмет, жолда қалып кетіп едік, сүйреп, жанармай құятын бекетке алып бара жатыр. Алланың нұры жаусын Түркістан облысының патрульдеріне! Рақмет көп-көп. Жолда қалдырмады, — деді бейнежазба иесі.
Желі қолданушысының бейнежазбасы департамент қызметкерлері тарапынан бірден назарға алынды. Қарапайым жолаушылардың алғысын арқалаған полицейлерді анықтап, тілдесті.
Оқиға осыдан бірнеше күн бұрын болған. Түркістан облысы Полиция департаменті патрульдік полиция батальонының полицейлері полиция капитандары Мақсат Мақұлбеков пен Бейбіт Әжібаев әдеттегідей өздеріне бекітілген аумақты патрульдеу үшін қызметтік міндеттеріне кіріседі.
Жолда кетіп бара жатып Шымкент-Самара тас жолында жолдың шетінде көлік тоқтатып тұрған шетелдік «Хонда» маркалы жеңіл көлігін байқайды. Қос полицей бірден көліктің жанына барады. Жүргізушіден қандай көмек қажет екенін сұрағанда, ол жанар жағармай бекетіне жетіп алғысы келгенімен көлігі жүрмей қалғанын, жол бойында ешқандай көлікте артық жанар жағармай болмай, бір сағат бойы күннің ыстығында қиналып тұрғанын айтады.
Көлік ішінде жүргізушінің анасы мен кәмелет жасына толмаған 3 баласы болған. Патрульдік полицейлер бірден көліктеріне жеңіл көлікті құрал арқылы жалғап, 25-30 шақырым арыда орналасқан жанар жағармай бекетіне дейін сүйреп жеткізеді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Қарапайым полицейлерден дер кезінде көмек алған жүргізуші мен жолаушылар өздерінің шынайы алғыстарын айтып, ризашылықтарын жеткізді.
ТО ПД-нің баспасөз қызметі