Полицейлер – алдынан көмек сұрап кездескен әрбір жанға қол ұшын созуға, жәрдем етуге асығатын жандар. Мәселен, кезекті жұмыс күнінде Келес аудандық полиция бөлімі жергілікті полиция қызметі бөлімшесінің бастығы полиция полковнигі Ерғали Базарқұлов, жол бойында жалғыз кетіп бара жатқан қарт әйелді көреді. Содан оның жанына тоқтап, қал-жағдай сұрасқаннан кейін әжейдің Шұқырсай елдімекеніндегі ұлының үйінен шыққанын, жол бойынан таксиге мінемін дегенмен, көлік болмағанын, содан Абай ауылындағы өз үйіне жаяу келе жатқанын жеткізеді. Ал екі ауылдың арасы 10 шақырым қашықтықты құрайды.
Содан тәртіп сақшысы айдалада кездескен ақ жаулықты ананы қызметтік автокөлігіне отырғызып, үйіне дейін жеткізіп салады. Өз кезегінде Хуморай Асқарова болса, полицейге шынайы алғысын жаудырады. Ойламаған жерден кезігіп, үйге жетуіне көмектескен полицейге, олардың әріптестеріне жағымды пікірлерін білдіріп, ақ батасын береді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Хуморай әжей өз сөзінде: «Бізге ұқсап 90-100 жасқа келе беріңдер. Жол да жүресің бе, қырда жүресің бе үнемі жолдарың болсын! Айналайын, отбасыларың аман болсын! Жұмыстарың алға бассын!,-деп рақметін айтады.
Түркістан облысының полицейлері жолда қалған тұрғындар, жоғалған балалар, қандай да бір көмекке мұқтаж жандардың қашанда жәрдемшісі болып, жанынан табылуды мақсат еткен, жалпы дәстүрге айналдырған десек те болады. Мұндағы басты мақсат — халыққа жақын полицей болу!
ТО ПД-ның баспасөз қызметі
