Созақ аудандық полиция бөлімінің бастығы, полиция подполковнигі Береке Махаш халықты біршама жұмыстардың нәтижесімен таныстырды. Аудан көлемінде әкімдіктің және полиция бөлімінің жеке құрамымен меншікке қарсы қылмыстардың алдын алу және болдырмау мақсатында аудан тұрғындарына, оның ішінде жеке кәсіпкерлерге, адамдар көп шоғырланатын орындарда түсіндірме жұмыстары үздіксіз жүргізілуде. Осының нәтижесінде Созақ АПБ Жергілікті полиция қызметі бөлімшесімен 2020 жылдың 3 айымен салыстырғанда мас халде жасалған қылмыстар 4-тен 1-ге төмендеген, ал, бөтеннің мүлкін ұрлау 32-ден 3-ке, мал ұрлығы 5-тен 3-ке, пәтер ұрлығы 5-тен 1-ге азайған.
Сонымен қатар жүргізушілердің жол жүру қағидаларын бұзуларының алдын алу үшін жол көлік оқиғасы көп орын алған жолдарға патрульдік полиция қызметкерлерімен және жергілікті полиция қызметінің учаскелік полиция инспекторларымен, жол-көлік оқиғасының алдын алуға және жолын кесуге бағытталған іс-шаралар үздіксіз ұйымдастырылғанын ерекше атап өтті. Мәселен, аудан көлемінде “Қауіпсіз жол”, “Құқықтық тәртіп”, “Автобус”, “Қару”, “Айдап әкету” және “Назар аударыңыз, балалар”, “Абайлаңыз, балалар” сынды тағы да басқа атаулармен республикалық, облыстық және аудандық жедел-профилактикалық іс-шаралар өткізілген.
Сондай-ақ, жүргізушілер арасында көлік тәртібін арттыру, жол-көлік оқиғаларын төмендету және жол жүрісі қағидаларын бұзудың алдын алу жұмыстарын арттыру мақсатында, Созақ АПБ жеке құрамымен жол-көлік оқиғаларына тікелей әсер ететін 7 басым бағыт бойынша, яғни ҚР ӘҚБтК-нің 590, 591, 593, 595, 596, 600, 608, 615-баптарында көрсетілгендей, әкімшілік құқық бұзушылықтарды анықтау мақсатындағы жұмыстар тұрақты түрде жүргізілуде — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Бүгінде еліміз бойынша “SOS 102” мобильді қосымшасы жұмыс жасайды. Кез келген азамат өзінің смартфоны арқылы осы қосымшаны жүктеп алып, полиция бөлімімен қажет болған жағдайда хабарласа алады. Осы қосымша арқылы полицияға қоңырау шалған адам, полиция бөлімшесіндегі кезекшімен тікелей байланысқа шығып, өзінің арыз-шағымын айта алады, және де оқиға орнындағы мән-жайды бейне арқылы көрсете алады. Бұл қосымша азаматтар үшін өте тиімді және де түсінікті етіп жасалған. Сонымен қатар, аудан орталығында арнайы «фронт-офис» жұмыс жасайды. Кез келген азамат сол офиске барып, өзінің арыз-шағымын, ұсыныс-пікірлерін айтып, керекті ақпарат ала алады.
ТО ПД-ның баспасөз қызметі
