Бүгінде әрбір азамат ішкі істер министрлігіне қатысты қандай да бір көкейтесті мәселесі, ұсыныс-пікірі, сауалы болса, тікелей қоюына, жолдауына ықпал ету мақсатында барынша жағдай жасалуда. Түрлі бағытта тікелей эфирлер ұйымдастырып, халықпен қолайлы байланыс орнату үшін әрбір ПД жанынан халықтық-кеңселер ашылған.
Осыған байланысты Түркістан облысы Полиция департаментінің әлеуметтік желідегі ресми парақшаларында тікелей эфир арқылы әр аптаның жұма күні брифинг өткізілуде. Онда ПД-нің әрбір салалық құрылым басшылары тікелей эфирге шығып, өздерінің басқарма, бөлім қызметкерлерімен атқарылған жұмыстары мен алдағы жоспарларын ашық, әрі нақты айтып өтуде.
Бұл аптадағы брифингтің тақырыбы: «Халықтан заңсыз сақталудағы қаруды, оқ-дәрілер мен жарылғыш заттарды сатып алу бойынша кезекті акцияны өткізу туралы». Ал қонақ ретінде Түркістан облысы Полиция департаменті Әкімшілік полиция басқармасының бастығы, полиция полковнигі Алмас Тастанбеков келді. Іс-шара кезінде облыс тұрғындарында бар заңсыз қаруларды ақшалай сыйақыға өткізуге мүмкіндік бары түсіндірілді. Тікелей эфирді 200-ге жуық желі қолданушылары қарады — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Полиция полковнигі А. Тастанбеков өз сөзінде: «Әкімшілік полиция қызметкерлерімен жыл басынан бері 3 рет «Қару» жедел-профилактикалық іс-шарасы өткізілді. Оның соңғысы 5-8 сәуір аралығында ұйымдастырылып, 4 тәулікте облыста 18 аңшы қаруы тәркіленді. Сондай-ақ 3200-ден астам қару иелері тексеріліп, 160 әкімшілік құқық бұзушылық анықталды. Дер кезінде анықталған құқықбұзушылықтарға сәйкес хаттамалар толтырылды. Ал сәуірдің 20-сы күнінен бастап , облысымызда халықтан заңсыз сақталудағы атыс қаруын, оқ-дәрілер мен жарылғыш заттарды сатып алу туралы арнайы акция өткізілмек. Мемлекет тарапынан осы үшін біздің облысқа тиісті қаржы бөлініп отыр. Сондықтан, жергілікті тұрғындар қолдарыңызда еш жерде тіркелмеген қару түрі болса, бізге өткізіп, сыйақыға ие болсаңыз болады»,-деп атап өтті.
Құрметті Түркістан облысының тұрғындары, қолжетімді полиция қағидатын қалыптастыру үшін, мұндай іс-шаралар алдағы уақытта да ұйымдастырылып тұратын болады.
ТО ПД-ның баспасөз қызметі
