Түркістан ҚПБ-на жергілікті тұрғын әйел арызданып келеді. Оның айтуынша, кешкі уақытта әйелдер түсетін моншаның ішінен өзіне тиесілі қара қол сөмкесін әлдебіреулердің жымқырып кеткенін көрсеткен. Ал сөмкенің ішінде құны 80 мың теңге болатын алтын жүзігі мен банкомат картасы болған. Жалпы жәбірленушіге келтірілген шығынның көлемі 220 мың теңгені құрайды. Аталған жайтты полиция қызметкерлері ҚР ҚК-нің 188-бабы «Ұрлық» бойынша тіркеді. Өзіне белгіленген аумақта, ұрлық жайты орын алғанын білген учаскелік полицей полиция капитаны Нұржан Маханов күдіктіні ұстау мақсатында, жедел-іздестіру шараларын жүргізді. Жан-жақты іздестіріп, куәгерлерден сұрастырып, бейнебақылау камераларын тексерді. Нәтижесінде жергілікті учаскелік полицей тәулік ішінде күдіктіні мекенжайынан ұстап, бөлімшеге жеткізді — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Тергеу барысында анықталғандай, күдікті моншаға кіріп жатқан әйелді біраз бақылап затын тастағанын күткен. Содан жәбірленуші әйелдің ішке кіргенін көрген күдікті, өз арам ойын жүзеге асырып сөмкесін жымқырып кеткен. Қазіргі таңда күдікті әйел өз кінәсін толықтай мойындады. Айғақты зат ретінде ұрланған заттар тәркіленіп, заңды иесіне қайтарылды. Күдіктінің бас шарасы қолхатта.
Өз кезегінде Түркістан облысының полицейлері бағалы заттарыңыз бен әшекей бұйымдарыңызға мұқият болуларыңызды ескертеді. Сондай-ақ ғимараттарға, тұрғын үйлерге бейнебақылау камераларын орнатуға кеңес береді. Ұрлықтың алдын алу мақсатында, қауіпсіздікке баса назар аудару қажет. Қандай да бір ұрлықтың құрбаны не куәгері болсаңыз, өздіктеріңізден іздеп уақыт жоғалтпастан, полицейлерге хабар беріңіздер.
ТО ПД-ның баспасөз қызметі
