Арыс аудандық полиция бөліміне жас қыз арызданып, ішіп келген әкесі үйлерінде шу шығарып жатқанын хабарлаған. Ақпарат түсісімен сол аймаққа бекітілген учаскелік полиция инспекторлары көмекке аттанады. Тәртіп сақшылары көрсетілген мекенжайға жетіп, отбасылық ұрыс-керістің үстінен түседі. Осы сәтте шенділерді көрген отағасы бірден ашуға беріліп, аузына келген сөзді айтып балағаттап, түрлі боқтық сөздерді қарша боратады.
Ал, полицейлер заңды талапқа бағынуды ескертіп, ер адамды сабырға шақырады. Алайда, ащы суға сылқия тойған тұрғын еш тоқтамай, өзінің дөрекі мінез көрсетуін жалғастыра береді. Тіпті учаскелік полиция қызметкеріне қол көтермекке ұмтылады. Десек те полицейлер отбасының шырқын бұзып, өзгелердің мазасын алған тұрғынды тыныштандырып, мастық дәрежесін анықтау үшін ауруханаға жеткізеді. Медициналық қорытындыға сәйкес, ер адам «орта дәрежелі» мас күйде екендігі белгілі болды.
Болған жағдайға байланысты полицейлерді балағаттаған тұрғынға қатысты ҚР ҚК-нің 378-бабы «Билік өкілін қорлау» бойынша сотқа дейінгі тергеу амалдары жүргізілуде. Оған қоса аталған жайт ҚР ӘҚБтК-нің 73-бабы «Отбасы-тұрмыстық қатынастар аясындағы құқыққа қарсы әрекеттер» бойынша тіркелді. Әкімшілік шара көрілу үшін жинақталған іс-құжаттары сотқа жолданды. Сондай-ақ әйел қорғау нұсқамасына алынды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Атап өтер жайт, осыдан бір жыл алдында бұл отбасының әйелі күйеуінің үстінен шағымданып, істері сотқа дейін жеткен. Бірақ, соңында әйелдің кешірім беруімен іс қысқартылған көрінеді. Осыған қарамастан, отағасы арасында ішімдік ішіп, отбасын келеңсіз жағдайға қалдырыруды әдетке айналдырған.
Жалпы, Түркістан облысы Полиция департаментінің полицейлері осындай отбасы-тұрмыстық зорлық-зомбылықтың алдын алу мақсатында, тұрақты түрде профилактикалық түсіндірме жұмыстарын жүргізіп келеді. Тіркелген жайсыз отбасылар мен қорғау нұсқамасына алынған тұлғалармен жеке-дара түсіндіру жұмыстары жүргізіліп жатқанын хабарлаймыз.
Сондықтан Түркістан облысы полицейлері азаматтарға мас күйде жүріп, тұрғындардың мазасын алмау керектігін ескертеді. Сонымен қатар, өз қызметтік міндетін атқаруға келген билік өкілдеріне күш қолданудың соңы, қылмыстық жауапкершілікке апаратынын ескертеді. Сондықтан қарсылық көрсетіп, құқық бұзушылық жасағанша, өз қауіпсіздігіңізді ескеріп, заң талаптарына бағынғандарыңыз жөн. Егер де, сіз, осындай оқиғалардың құрбаны немесе куәгері болсаңыз, полицейлерге хабар беріңіз!
ТО ПД-ның баспасөз қызметі
