Сайрам АПБ-на жергілікті тұрғын кәсіпкер арызданады. Ер адамның айтуынша, оның азық-түлік дүкеніне белгісіз біреу ұрлыққа түскен. Яғни дүкеннің сыртқы есігін бұзу арқылы ішке еніп, кассадағы 200 000 теңгеге жуық ақшасы мен бірнеше сусындарын жымқырып кеткен. Аталған жайтты полицейлер ҚР ҚК-нің 188-бабы «Ұрлық» бойынша тіркеуге алды.
Тәртіп сақшылары осы ұрлық қылмысына қатысы бар күдіктіні ұстау мақсатында оқиға орнына дереу жетті. Көрген-білгендерден жауап алды, жақын аумақтарды мұқият қарап шықты. Іздестіру кезінде, бір апта көлемінде келесі тұрғын осындай қылмыстың құрбаны болып, арыз түсіреді. Мұнда жәбірленушінің дүкеніне түскен ұры, барлығы 300 000 теңгенің заттарын, кассадағы ұсақ тиындарын үптеп кеткен. Бұл жолы да ұры есікті бұзу арқылы кіріп, арам ойын іске асырған. Орын алған ұрлық қылмыстарын бір адам жасауы мүмкін деген ойға келген полицейлер, іздестіруді одан әрі жалғастырып, қарқынды қызмет етті. Барлық бейнебақылау камералары тексерілді. Соның нәтижесінде күдікті адамның жеке басы анықталып, ол өз үйінен ұсталды. Жергілікті тұрғын АПБ-не жеткізілді. Ол өз кінәсін толық мойындады.
Тергеу барысында анықталғандай, күдікті оңай жолмен пайда табу мақсатында ұрлыққа түскен. Ұрланған заттар күдіктінің үйінен тәркіленіп алынып, заңды иелеріне қайтарылды. Күдіктінің бас шарасы қолхатта — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Түркістан облысының полицейлері азаматтарға кеңселер мен дүкендерге, сауда орындары мен жекеменшік иелігіндегі нысандарға сақтық үшін бейнекамера орнатып, терезелерін темір тормен жабдықтауға кеңес береді. Есіктеріне мықты құлыптар орнатуға шақырады. Егер де, сіз, бөтеннің мүлкін ұрлаудың құрбаны немесе куәгері болсаңыз, шұғыл полицияға 102 телефоны бойынша хабарласыңыз.
ТО ПД-ның баспасөз қызметі
