Бұған дейін Бәйдібек АПБ-ның кезекші бөліміне жергілікті тұрғын өзінде есірткі заттарын сақтайтыны туралы хабарлама келіп түскен болатын. Осыдан соң полицейлер күмәнді орындарды назарда ұстап, тексеру жұмыстарын жүргізе бастады. Жүргізілген жұмыстардың нәтижесінде Бәйдібек АПБ-ның полицейлері аудандағы жылқы бағатын жылқышыны күдікті ретінде ұстады — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Яғни Ақбастау ауылынан 10 шақырым жердегі мал қораны тінту кезінде жедел уәкілдер қора жанында орналасқан сарайдан есірткі затына ұқсас сіріңке қорабына салынған өсімдік тектес затты тауып, тәркіледі. Тәркіленген заттай дәлелдемелерді тәртіп сақшылары тиісті сараптамаға жіберді. Оның қорытындысы бойынша сіріңке қорабында салмағы 1 грамнан асатын «кептірілген марихуана» сақталғаны анықталды.
Аталған жайт Бәйдібек АПБ-ның қызметкерлерімен СДТБТ-ға ҚР ҚК-нің 296-бабы «Есірткі, психотроптық заттармен, сол тектестермен өткізу мақсатынсыз заңсыз жұмыс істеу» бойынша тіркелді. Қазіргі уақытта жылқышыға қатысты сотқа дейінгі тергеу амалдары жүргізілуде.
Түркістан облысының полицейлері азаматтарға есірткі заттарын заңсыз сақтағаны мен таратқаны үшін қылмыстық жауапкершілік қарастырылғанын ескертеді. Сондай-ақ тәртіп сақшылары есірткіні тұтынудан аулақ болуды және салауатты өмір салтын ұстануды ұсынады. Егер сіз осындай қылмыстардың куәгері болсаңыз, дереу полицияның 102 нөміріне хабарласыңыз.
Түркістан облысы ПД-нің баспасөз қызметі
