Түркістан облысының полицейлері бұрынғы жұмыс орнына ұрлыққа түскен жас жігітті ұстады

Сайрам аудандық Полиция басқармасына Шымкент қаласының тұрғыны арызданады. Ер адамның айтуынша, оның Сайрам ауданы Ақсукент ауылында орналасқан өндірістік мекемесінің аумағына түнгі уақытта белгісіз адамдар заңсыз кіріп, ұрлық жасаған. Яғни ұрылар жылжымалы кранның 50 метр құрайтын қозғалтқыш сымдарын жымқырып кеткен. Жәбірленушіге келтірілген шығын көлемі 380 000 теңгені құрады. Аталған жайт сотқа дейінгі тергеп-тексерудің бірыңғай тізіліміне енгізіліп, ҚР ҚК-нің 188-бабы бойынша тіркелді.
Ұрлық қылмысы жайлы хабар алысымен жедел-тергеу тобы оқиға орныН(а шықты. Тәртіп сақшылары тексеру барысында мекемеден тағы бірнеше құрылысқа қажетті құралдардың ұрланғанын анықтады. Куәгерлерден жауап алып, ұрыны ұстауға қажетті іс-шараларды жүргізді. Нәтижесінде ақпарат көздері арқылы күдіктінің жеке басы анықталып, ол тұрғылықты мекенжайынан ұсталды. Күдікті жергілікті тұрғын болып шықты.
«Жау алыстан келмейді» дегендей, тергеу барысында күдіктінің алдын осы мекемеде жұмыс істегені белгілі болды. Тәртіп сақшылары ұрланған заттарды күдікті, танысының үйіне жасырып қойған жерінен тауып, тәркілеп алды. Күдіктінің бас шарасы «қолхатта». Қазіргі таңда сотқа дейінгі тергеу амалдары жүргізілуде. Күдіктінің бұдан басқа да қылмыстарға қатыстылығы тексерілуде — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Өз кезегінде Түркістан облысының полицейлері тұрғындарға өз мүлкін қараусыз қалдырмауға кеңес береді. Сондай-ақ қоймалардың және өзге де үй-жайлардың есіктері мен терезелерін сенімді құлыптар, темір торлармен нығайтуды ескертеді. Егер де, сіз, ұрлықтың құрбаны не куәгері болсаңыз, тез арада полицияға 102 нөміріне хабарласыңыз.
ТО ПД-ның баспасөз қызметі