Бүгін ІІМ-нің тапсырмасына сәйкес Түркістан облысы Полиция департаментінде «инстаграм» және «фейсбук» желілерінің тікелей эфирінде «Автокөлікті басқару кезінде жүргізуші құжаттарының болуы нормасын алып тастауға қатысты заңнамадағы өзгерістер» тақырыбында брифинг өтті. Аталған брифингке Әкімшілік полиция басқармасының бастығы полиция полковнигі Алмас Тастанбеков арнайы шақырылып, заңға енгізілген өзгерістер мен толықтыруларды қалың көпшілікке нақтылап түсіндіріп берді.
Сонымен қатар осы тұста желі қолданушылары да жазбаша түрде өз сауалдарын жолдап, көкейтесті сұрақтарының нақты жауаптарына қанық болды — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Мәселен, жалпы облысымызда аталмыш заңдағы өзгерістерге байланысты қандай жұмыстар жүргізілуде? Құжатсыз жүрген жүргізушілер кездесті ме? Жүргізушілер бұл жаңа норманы қалай қабылдап жатыр? Осы сияқты бірнеше сұрақтар қойылды.
Өз кезегінде тұрғындарды мазалап жүрген сауалдарға полиция басшысы тікелей эфирде жауап беріп, кейбір сауалдар мен мәселелер бойынша қызметкерлерге тапсырма беретінін жеткізді.
Айта кететін жайт, қолжетімді полиция қағидатын қалыптастыру мен полицияның тұрғындармен кері байланыста болуы үшін мұндай іс-шаралар алдағы уақытта да ұйымдастырылып тұратын болады.
ТО ПД-нің баспасөз қызметі
