2021 жылдың 1 ақпанынан бастап Ішкі істер министрі Е.Тұрғымбаев қазақстандықтарды «102» қосымшасын пайдалануға шақырған болатын. Министрдің айтуы бойынша халыққа ыңғайлы жаңа сервис, яғни 102 мобильдік қосымшасы орын алған оқиғалар мен азаматтардың хабарламаларына тез арада жауап беру, жедел шараларды атқару арқылы көмек қолын созу үшін енгізілген. Сондықтан аталмыш қосымша бойынша, Түркістан облысы Полиция департаменті Штаб басқармасының бастығы полиция полковнигі Сейітжомарт Сейітхан тұрғындарға түсіндіріп берді.
«102 мобильдік қосымшасын кез-келген адам өз смартфонына жүктеп ала алады. Содан соң тіркеліп, өзіне қатысты мәліметтерді енгізеді. Егерде кез-келген жерде бір құқықбұзушылық пен төтенше жағдай орын алса, бірден осы қосымша арқылы бейнежазба мен аудиожазба немесе мәтіндік хабарламаны полицияға жолдайды. Өз кезегінде полиция қызметкері түскен хабарламаны алып, оқиға болған жерге жедел түрде полицейлерді бағыттайды. Бүгінгі күнге дейін бірнеше тұрғыннан 102 мобильдік қосымшасы арқылы аудиожазба қабылданды. Ол бойынша полицейлер жедел жұмыстарды атқарып, тиісті шараларды қабылдаған. Сондықтан бұл бағыттағы жұмыстар алдағы уақытта да жалғасын табады»,- деп атап өтті полиция полковнигі С. Сейітхан.
Сонымен қатар арнайы қосымшадан бөлек Түркістан облысы Полиция департаментінің кезекшілік бөлімі 102 қоңырауы арқылы тәулік ішінде 200-ге жуық қоңырауларды қабылдауда. Ал 102 мобильдік қосымшасы арқылы бірнеше тұрғынның аудиожазбасын тіркеп, ол бойынша тиісті жұмыстар жасалған. Мобильдік қосымша арқылы түскен аудиожазбалар көліктердің ретсіз қойылуына байланысты айтылған — деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Сондай-ақ 102 жедел желісі бойынша бір сағаттың ішінде бейнебақылау камералары арқылы полицейлер жол қозғалысы ережесін бұзған 3 көлік иесі мен қоғамдық орынды ластаған 2 азаматты анықтады. «Темір тұлпарларының» иелері қоюға тыйым салынған орынға келіп жайғасқан. Аталған жайт бойынша полицейлер бірден бағыт алып, оқиға орнына жетіп, жүргізушілерге ҚР ӘҚБтК-нің 597-бабымен (Көлiк құралдарын тоқтату немесе тоқтап тұру қағидаларын бұзу) хаттамалар толтырды. Екеуі сол мезетте полиция қызметкерінің заңды талабына бағынса, келесі жүргізуші оқиға орнынан ізін суытпақшы болды. Алайда полицейлер бейнебақылау камералары арқылы оның барған жерін анықтап, экипажды бағыттады.
Сондай-ақ қоғамдық орынды ластап, темекі тұқылын тастаған екі тұрғынға ҚР ӘҚБтК-нің 434-бабы «Ортақ пайдаланылатын орындарды ластау» бойынша әкімшілік шара көрілді.
ТО ПД-нің баспасөз қызметі
