Түркістан облысының орталығы Түркістан қаласы — Қазақстанның «Рухани астанасы» екені белгілі. Аталған киелі мекенге жыл сайын түрлі елдерден көптеген туристер келеді. Сондықтан, қала көшелеріндегі қоғамдық тәртіп пен жол қауіпсіздігін тәулік бойы патрульдік полиция, жергілікті полиция қызметі, туристік полиция жасақтары мен Түркістан қаласы полиция басқармасының жеке құрамы, соның ішінде жедел басқару орталығының бейнебақылау камераларының бақылауында болады-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Түркістан ҚПБ полиция күштерімен жүргізілген жедел-іздестіру және алдын алу іс-шаралары шеңберінде 2020 жылдың қорытындысы бойынша қылмыстар саны 2019 жылмен салыстырғанда 27,9% — ға төмендеген. Оның ішінде, бөтеннің мүлкін ұрлау 2020 жылы 395 деректі құрап, бұл 2019 жылға (614) қарағанда 35,7%-ға азайғанын көрсетіп отыр. Ал, пәтер ұрлығы 2020 жылы 125 жайтты құрады, бұл 2019 жылға (200) қарағанда 37,5%-ға төмен.
Түркістан облысы бойынша 2020 жылдың 12 айында тіркелген қылмыстар саны 2019 жылмен салыстырғанда 28%-ға, оның ішінде бөтеннің мүлкін ұрлау 53,8%-ға төмендеді, мәселен, егер 2019 жылы бөтен мүлікті ұрлау бойынша 3639 жайт тіркелген болса, 2020 жылы-1680 жайт болған.
Бұдан басқа, 2020 жылдың 12 айының қорытындысы бойынша облыс орталығындағы жол-көлік оқиғаларының саны 17,4%-ға, қаза тапқандар 46,1%-ға және зардап шеккендер 22,6%-ға азайды.
Бөтеннің мүлкін ұрлауды және өзге де қылмыстар мен әкімшілік құқық бұзушылықтарды одан әрі азайту мақсатында Түркістан ҚПБ басшылығы криминогендік жағдайды жақсарту, қоғамдық құқықтық тәртіпті қамтамасыз ету, қылмыстар мен құқық бұзушылықтардың алдын алуды жүргізу, сондай-ақ жол көлік оқиғаларының алдын алу мен жол қозғалысы ережелерінің сақталуын бақылау бойынша шаралар қабылдауда.
ТО ПД-ның баспасөз қызметі
