Сайрам АПБ-на жергілікті тұрғын арызданады. Жәбірленуші азаматтың айтуынша, күндізгі уақытта белгісіз тұлға оның тұрғын үйіне ұрлыққа түскен. Пластик терезесін бұзу арқылы кірген ұры, жәбірленушіге тиесілі түрлі алтын бұйымдарын жымқырып, жалпы құны 2 миллион теңгеден астам шығын келтірген. Аталған жайт ҚР ҚК-нің 188-бабы «Ұрлық» бойынша тіркелді-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Ақпарат алысымен оқиға орнына тез арада жедел-тергеу тобы барады. Тәжірибелі аудандық полицейлер ұрлық болған үйді жақсылап тексеріп, күдіктіні ұстауға қажетті барлық шараларды атқарады. Көрген-білгендерден жауап алып, бейнебақылау камераларын мұқият қарап шығады. Осындай 3 сағаттық жұмыстың ішінде күдікті тұлға анықталып, өз үйінен ұсталады. Ол бұрын сотты болған жергілікті тұрғын болып шықты. Күдіктінің тұрғылықты мекен-жайынан ұрланған заттардың бір бөлігі табылды. Айғақты зат ретінде алынған заттар заңды иесіне қайтарылды. Күдікті қамауға алынды.
Тергеу барысында анықталғандай, күдікті бұдан бөлек тағы бір үйге ұрлыққа түсіп, құны 160 000 теңгелік теледидарын қолды қылған. Қазіргі таңда күдіктінің басқа да қылмыстарға қатысы бар-жоғы анықталуда. Белгілі болғандай, күдікті үйде адам жоқтығын пайдаланып, есік-терезелерін бұзу арқылы арам ойын іске асырып отырған. Осылайша жеңіл жолмен ақша таппақ болған. Тергеу амалдары жүргізілуде.
Өз кезегінде ұрлықтың құрбаны болған тұрғындар, жоғын тауып берген тәртіп сақшыларына алғысын айтты. Қиын да қауіпті жұмыстарына табыс тіледі.
Түркістан облысының полицейлері азаматтарға үйлерін қараусыз қалдырмауға кеңес береді. Сонымен қатар қылмыс орын алған сәтте тез арада полиция бөліміне барып арыздануды немесе «102» телефонына хабарласуды ескертеді.
ТО ПД-нің баспасөз қызметі
