Бәйдібек АПБ-не жергілікті тұрғын арызданған. Жәбірленушінің айтуынша түнгі уақытта тұрғылықты үйінің ауласында орналасқан мал қорасының артқы бөлігін бұзу арқылы белгісіз азаматтар кірген. Содан 9 бас уақ малдарын ұрлап кеткен. Жәбірленушіге келтірілген жалпы шығын көлемі 400 мың теңгеге жуық. Тәртіп сақшылары аталған жайтт ҚР ҚК-нің 188-1-бабы «Мал ұрлығы» бойынша тіркеп, сотқа дейінгі тергеп-тексеру амалдарын бастап кетті-деп хабарлайды 102info.kz ақпарат агенттігі Түркістан облысы полиция департаментіне сілтеме жасап.
Полицейлер тұрғындардың төрт- түлігін қолды еткен ұрыларды ұстау мақсатында қажетті деп танылған іс-шараларды жүзеге асырды. Көрген-білгендерден жауап алып, жақын аймақтарды түгел қарап шықты. Мал базарлары мен көліктер мұқият тексерілді. Осындай жан-жақты жұмыстардың нәтижесінде жинақталған ақпарат көздері арқылы 3 ер азамат ұсталды. Олар Шымкент қаласының тұрғындары болып шықты.
Тергеу барысында анықталғандай күдіктілер бұл жайттан бөлек 2 тұрғынның 5 ірі қара малдарын ұрлап, жалпы құны 1 500 000 теңгеге жуық шығын келтірген. Яғни күдікті үшеу алдын ала сөз байласқан. Келісілген уақытта тұрғындардың малдарын ұрлап, өздері мініп келген жүк көліктеріне салып, оқиға орнынан бой тасалаған. Ұрланған үй жануарларын мал базарға барып сатып, ақшаларын өзара бөліске салған. Қазіргі таңда күдіктілер қамауға алынып, тергеу амалдары жалғасуда.
Сондықтан полицейлер облыс тұрғындарына ескертеді: қора-қопсыны мықтап қоршап, бекітіп, малды жайылымға жіберер кезде сенімді адамға немесе бақташыға тапсырыңыз! Оларды дер кезінде таңбалап, сырғалаңыз! Күн суытып, соғым уақытында ірі қаралар көптеп жоғалады, сол себепті алдағы мезгілдерді ескере отырып, төрт түлікке барынша сақ болыңыз! Ұрының сіздің салғырттығыңызды пайдаланып, малыңызды иемденіп кетуіне мүмкіндік бермеңіз!
ТО ПД-нің баспасөз қызметі
